Í Tálknafjarðarskóla eru rúmlega 30 nemendur á grunnskólaaldri. Skóladagurinn hefst kl 8.10 og er boðið upp á jógastund eða yndislestur fyrstu 10 mínútur skóladagsins áður en eiginleg kennsla fer fram. Kennslustundir eru 40-60 mínútur. Boðið uppá ávaxtastund eftir frímínútur gegn vægu gjaldi í stað hefðbundis nestistíma. Gott og heilsusamlegt mötuneyti er í skólanum þar sem eldað er á staðnum og eldað frá grunni. Allir nemendur og starfsfólk borðar á sama tíma í nýuppgerðu mötuneyti skólans. Einu sinni yfir skólaárið fær hvert stig að velja heilan vikumatseðil í samráði við matráð skólans.

Samkennsla er í öllum árgöngum og skipt er í tvo teymiskennslu hópa;  yngsta stig og mið- og unglingastig. Mikil samvinna er þvert á hópa, niður í elstu börn leikskóla, þar sem farið er í reglulegt hópastarf. Auk þess fara elstu börn leikskólans í vikulega tíma með yngsta stigi í hópavinnu í samþættum námsgreinum, forritun/vísindi ásamt listgreinum. 

Á miðstigi hefur verið í þróun að bjóða uppá aukið val, en á skólaárinu 2023-2024 býðst þeim tveir tímar á viku í val en boðið er upp á fleiri valgreinar á unglingastigi. 

Skólinn er öflugur Grænfánaskóli og tekur einnig þátt starfinu sem Heilsueflandi skóli. Við leggjum mikla rækt við að vera sjálfbær, vistvæn og græn.